როგორ განვაახლოთ ძველი ავეჯი?

რაც უნდა ხარისხიანი იყოს ავეჯი, რაღაც პერიოდის გავლის შემდეგ, მაინც საჭიროებს მცირედ განახლებას. არსებობს რესტავრირების რამდენიმე მეთოდი, სასურველი ვარიანტი შეარჩიეთ იმის მიხედვით თუ რა გამოცდილებას, ცოდნასა და უნარებს ფლობთ ამ სფეროში. მუშაობის დაწყებამდე აუცილებელად შეამოწმოთ ავეჯი, რომლის განახლებასაც გეგმავთ, თუ ავეჯი მხოლოდ ზედაპირულადაა დაზიანებული და მთლიანობაში ძირითადი მასალა მყარია, მაშინ, უკვე თამამად შეგიძლიათ რესტავრირების პორცესის დაწყება.  განახლების ყველაზე გავრცელებული მეთოდებია:  დაძველების მეთოდი, გადაღებვა, გადაკვრა და სხვ...

განახლება დაძველების მეთოდით

ეს მეთოდი გამოიყენება არა მარტო დაზიანებული ავეჯის აღსადგენად, არამედ ახალი ავეჯის ვიზუალის შესაცვლელადაც, რათა დააკმაყოფილოს გარკვეული სტილის სტანდარტები. ხელოვნური დაძველების მეთოდი როგორც ძველ, ასევე ახალ ავეჯს საოცარ შარმს, ორიგინალურ იერს და მიმზიდველობას ანიჭებს. ასეთი ავეჯი შესაფერისია პორვანსის, ქანთრის და სხვა მსგავსი სტილის ინტერიერისთვის. ამ მეთოდის გამოყენება დიდ უნარებს და გამოცდილებას არ მოითხოვს და მარტივ პროცესად ითვლება. ავეჯის დაძველებისთვის ყველაზე ხშირად გამოიყენება შემდეგი მასალები:

ცვილი ანტიკვარული ეფექტით

მის გამოყენებამდე ავეჯი მაქსიმალურად გაასუფთავეთ. შემდგომ ზედაპირზე დაიტანეთ საკალასე საღებარი, რომელიც ავეჯს აძლევს ერთ გარკვეულ ფერს და ისე ჟღინთავს, რომ აფსკს არ წარმოქმნის. ამის შედეგად მიიღებთ მკაფიოდ ხილულ ტექსტურას. საკალასე საღებარის ბოლომდე გაშრობას სჭირდება დაახლოებით 8 საათი. მანამდე ნარჩენები ფრთხილად მოასუფთავეთ ღრუბელით. გაშრობის შემდეგ განახორციელეთ ცვილის შეზელვა ზედაპირზე, რის შედეგადაც მიიღება ავეჯი დაძველების ეფექტით. აკრილის საღებავის გამოყენებით ზედაპირი შეგიძლიათ გააფორმოთ სხვადასხვა ნაყშებით, ვენზელით, ორანმენტით, არაბესკით. დასრულებული ნამუშევარი დაფარეთ ლაქით. ასეთი ცვლის გამოყენება რეკომენდებულია მხოლოდ ხის კონსტრუქციებისთვის.

აკრილის საღებავი

გამოიყენება არა მხოლოდ ხის, არამედ ლითონის, პლასტმასის, ქვისა და სხვა დანარჩენი მასალისგან დამზადებული ავეჯისთვის. სასურველი ეფექტი მიიღება ორი სხვადასხვა ფერის ჩრდილის კომბინაციით, რომელთა შორის განსხვავება მინიმუმამდე უნდა იყოს დაყვანილი.
ეცადეთ სამუშაო ზედაპირი იყოს თანაბარი და მაქსიმალურად სუფთა. ზემოთხსენებული ორი ფერის საღებავი წაუსვით ზედაპირზე თანამიმდევრობის დაცვით რამდენიმე ფენად. იდეალური შედეგისთვის აუცილებელია ყოველი მონაცვლეობითი ფენა გაშრეს ბოლომდე. ამის შემდეგ ავეჯი განსაზღვრულ ადგილებში დაამუშავეთ წვრილმარცვლოვანი ზუმფარის ქაღალდით, ეს პროცედურა გამოკვეთილად გაამძაფრებს სიძველის ეფექტს.  

საჭირო მასალა და ხელსაწყოები:

სპეციალური ნაერთები, ლილვაკები, ფუნჯები, სპეციალური კონტეინერი, რესპირატორი, სუფთა ქსოვილები, ზუმფარის ქაღალდი, ცხიმსაწინააღმდეგო ხსნარები.

განახლება ღებვის მეთოდით

ეს მეთოდი ძირითადად გამოიყენება ხის ავეჯისთვის, რომელსაც ხანგრძლივი ექსპლოატაციის ან არაშესაბამისი ტემპერატურული პირობების  (ტენიანობა, ყინვა, პირდაპირი მზის სხივები...) გამო გაუჩნდა სხვადასხვა ტიპის ისეთი დაზიანებები, როგორიცაა ძველი საღებავის დასკდომა, აქერცვლა, გაუფერულება და ა. შ... ასეთ შემთხვევაში რეკომენდებულია აირჩიოთ წყლის ბაზაზე დამზადებული საღებავი. ამ ტიპის საღებავის შემადგენლობა ყველაზე უსაფრთხოა საცხოვრებელი ფართისთვის და გამოირჩევა გამძლეობით. ღებვის მეთოდით ავეჯის განახლებისთვის ყველაზე ხშირად გამოიყენება შემდეგი საღებავები:  
1. აკრილის საღებავი - მისი მოხმარება მარტივია, აღიარებულია ერთ-ერთ ეკომეგობრულ პროდუქტად, არ აქვს სპეციფიკური სუნი და შრება სწრაფად;
2. თიქსოტროპული საღებავი - ეს არის საღებავი ან ლაქის მასალა, რომელშიც სხვადასხვსა მდგომარეობის დროს იცვლება სიბლანტის ხარისხი. თავიდან საღებავი სქელია, მაგრამ ინტენსიური მორევისას  ხდება თხევადი და მარტივად გამოსაყენებელი. კედელზე დატანვისას ინარჩუნებს ნაკადს, მაგრამ ლილვაკის ან ფუნჯის გამოყენებისთანავე ის მყისიერად "იჭერს" ზედაპირს და მკვრივდება. შეღბვის შემდგომ არ ტოვებს ზოლებს, რის გამოც დამწყები მღებავებისთვის მარტივია მისი გამოყენება. აქვს მკვრივი სტრუქტურა და სრული გაშრობის შემდეგ მიიღება საფარი, რომელიც ვიზუალურად გავს პლასტმასის ზედაპირს.

მუშაობის თანამიმდევრობა:

თუ უკვე შეარჩიეთ შესაბამისი საღებავი, გაეცანით ინსტრუქციებს და დარწმუნდით, რომ საღებავის შემადგენლობა შეესაბამება დადგენილ ეკო სტანდარტებს, მაშინ დროა განახორციელოთ შემდეგი ნაბიჯები:
1. სამუშაო პროცესისთვის შეარჩიეთ ადგილი სადაც კარგი ვენტილაციაა ან ღია ფანჯარასთან;
2. საღებავისგან დაცვის მიზნით იატაკი დაფარეთ ქაღალდით;
3. სამუშაო პროცესისთვის იქონიეთ სათვალე და რესპირატორი;
4. დაშალეთ ავეჯი შემადგენელ ნაწილებად, ამოიღეთ უჯრები, მოხსენით ფურნიტურა. (კარი შეღებვის წინ უნდა მოიხსნას);
5. ისეთი დეტალები, რომელიც არ ექვემდებარება მოხსნას (სარკეები, მინა და ა. შ...) დაფარეთ სამღებრო სკოჩით;
6. ყველა დეტალი ჯეროვნად გაასუფთავეთ შესაბამისი სარეცხი საშუალებებისა და წყლის ნაზავით;
7. საჭიროა ზედაპირების პირველადი დამუშავება, რისთვისაც რეკომენდებულია გამოიყენოთ წვრილმარცვლოვანი ზუმფარის ქაღალდი.
8. შეღბვამდე დეტალები დაგრუნტეთ.
9. ბზარების და ნახეთქების აღმოჩენის შემთხვევაში ისინი ამოავსეთ საგოზავით.
10. ამ ყველაფრის შემდგომ გაიმეორეთ აკრილით გრუნტირება და კიდევ ერთხელ დაამუშავეთ ზედაპირი ზუმფარის ქაღალდით.
11. ამოასუფთავეთ ჩაღრმავებები ფუნჯით ან მტვერსასრუტით.
12. რეკომენდებულია როგორც შესასხურებელი, ასევე ქილის საღებავი:
ა) შესასხურებელი საღებავი - ბალონი მიასხურეთ ზედაპირებს 30 სმ-ის დაშორებით მოზომილი მოძრაობებით.
ბ) ქილის საღებავი განაზავეთ სპეციალურ ჭურჭელში და ზედაპირებზე დაიტანეთ ფუნჯის ან ლილვაკის გამოყენებით.
13. ძნელად მისადგომ ადგილებზე გამოიყენეთ ფუნჯი.
14. იდეალური ზედაპირის მისაღებად სასურველია საღებავის წასმა სამ ფენად.
15. გამშრალ ზედაპირს გადაუსვით თქვენი გემოვნების შესაბამისად შერჩეული პრიალა ან მქრქალი ლაქი;
16. მოხსენით დამცავი ლენტები მინასა და სარკეებს.

საჭირო მასალა და ხელსაწყოები:

საღებავი, ლაქი, პრაიმერი, საგოზავი, სპეცტანსაცმელი, დამცავი სათვალე, რესპირატორი, ზუმფარის ქაღალდი, რეზინის შპატელი, წებოვანი ლენტი, წყალი, საღებავის გასაზავებელი ჭურჭელი, ლილვაკები, ფუნჯები, სუფთა ფლასი.